umorismo libri biblioteche librerie barzellette comicità risoterapia comicoterapia tradizione lingua veneta
Editrice Scantabauchi
edizioni scantabauchi

LE RIFLESSIONI DE WALTER BASSO ... [ indice ]


Riflessioni del 26/10/2012

LA RICETA POLITICA DEL MESE: “TROTA AL CAROCIO”
Si chiappa una trota padana (quindi sensa tracia de fosforo) e se la mete par un toco inte la sede del Lega Nord in mezo ai liquidi in modo che la se anbienta par ben. Appena ragiunto el peso otimale (se parla torno i setanta chilogrami e ventitre ani de età) , se ghe varda l’ocio: se questo ze modelo “ocio bajo da porseo morto” vol dire che el pesse Trota ze pronto par essere messo al carocio. Quindi lo se veste da festa, lo se truca un poco in modo da mascherare un poco la notevole facia da mona, se ghe mete dei tiranti interni onde no farghe tegnere senpre la bocassa verta indice de dubia inteligensa, se ghe mete a disposission personale scolastico altamente specialisà e dala resistensa fisica e pissicologica estrema e lo se porta de peso in te na Rejon a piassere come assessore regionale. Se ghe dà sirca 12.000 euri al mese sempre in liquidi (essendo un pesse!), un autista co la passion dei cortometragi e vualà: eco servia al’Italico popolasso “la trota al carocio”. Dopo un poco de tenpo el pesson ze coto. A sto punto lo se branca par na branchia, lo se mete fora dala Rejon se ghe da do calci in culo par frolarlo par ben, e quindi ze pronto par èssare dà in pasto al popolo padano incazzato bestia che se lo paparà in un solo bocon!

EL MERAVILLIOSO MONDO DE QUARC POLITICO
GRILLO: Inseto spacamaroni che vive nele piasse e che no stà mai sito. Oltretuto el malvagio ogni volta chel canta el se tira drio na marea de grilini picecini che se mete cantare anca lori. Cussì, specie ultimamente, par tuti i cantoni del’italica penisola a ghe ze un cantamento del madona co estremo fastidio de tuti quei che ze concentrai co la testa dentro la grupia a magnare cofà porsei da grassa. Questi ghe ciama anca “inseto demagogo” (che no so cossa voja dire) o “inseto qualunquista”.
FORMIGONI: inseto un poco anomalo in quanto invesse de fare busi in tera e po’ scóndarse, l’ama forsenatamente l’aqua o mejo le barche de lusso che ghe stà sora. Distrato el perde senpre tuto: dale fature de pagamento, al’agendina dove el se nota le spese. El va de qua e de là de baucon e pare chel sapia tuto lu. El ze busiaro e falso. El apartien ala fameja dele formighe rosse che ze uno dei inseti più ingordi che se conossa. Infati un sagio modo de dire veneto recita cussì: “El ga na testa che no la magna gnanca e formighe rosse!”
VESPA: questo invesse de avere sul culo el sponcioto par becare chi che ghe stà sul casso, el ga na lenguassa longa e slipegosa per lecare tuti quei che ze al potere e poe farghe comodo. Invesse de svolare sora i fiori e ciuciare el dolse come fa tute le brespe par ben ghe piase tociare nel sangue, nele desgrsassie e ghe piase tanto zugare co casete, casoti, barchete… El ze pien de bruschi intel muso tanto chel pare na caca de un toseto che ga magnà mezo chilo de sarese col’osso.

L’ARTICOLETO AL PEVARONSIN
Econe ancora qua. Gero convinto el nùmaro passà de aver tocà el punto massimo del’incassadura ma me sbaliavo: oncò so za oltre osaria dire al limite dea soportassion. El figà ze deventà pari a quelo de un lionfante co la cirosi epatica, el fiele ze drio spassorare el livelo de guardia e i zebedei, ormai se ga slongà fin quasi a tocare tera. Preciso che mi alto squasi un metro e otanta. “Ma cossa sarà mai sucesso?” domandarà el solito, curioso e petegolo de letore, “ze sucesso che romai no se ghe ne poe più, de sentire, vedare e lèzare tute le vacade che i nostri governanti ogni santo dì ne propina!”… Da na parte ladrocinii, magnarie, tangenti de tute le sorte, fora che quele de geometria, putanismo alargà, trote che invece de stare soto aqua in assoluto e doveroso silensio parla a casacio e viaja in porsss, ministri che va sul palco coea scoa, governatori che fa ferie (coi schei dei altri) che gnanca Onassis se sognava, badanti che fa colession de diamanti, dobloni, lingoti de oro, da st’altra parte nialtri massa de minchioni che paghemo, paghemo, paghemo e tasemo. Al massimo porchesemo ma de scondon sconti in casa. Ogni dì riva na nova tassa e un novo aumento: l’IMU dopio (uno par el Stato e uno par el Comune… par tuti co esclusion dei beni del signor Papa e dele Banche), po’ aumento del aqua, luce e gas, aumento tassa dele scoasse, aumento giornaliero dela bensina, tichete, ecc., ecc. E alora vuto che no me incassa?: desso el Governo conpra altre 400 machine blu, ga speso oltre 700.000 euri par le agendine dei governanti (che dopo, co le serve, no i le cata più come Formigoni) e me dise a nialtri de tirarla???... VERGOGNA!!! No gò più parole.. ansi no, un poche me ze restà e visto che sarò anca poareto ma no peocioso ghe le regalo ai nostri governanti. Le ze poche, ma le ze sincere e le vien fora proprio dal cuore: “CHE DIO VE MANDA UN ATACO DE UN MESE DE SCAGOTO A SPRUSSO E CONTENPORANEAMENTE DO CHILI A TESTA DE MOROIDI INFIAMA’ ”. Bongiorno tuti!


MAILING LISTS - Iscriviti alle mailing lists di Edizioni Scantabauchi:     Oltre le nuvole     Scantabauchi
Inizio pagina